المجمرة
صحيت الصب
ح و كالعادة ما بافطرش في البيت و رحت الشغل و خلصت كالعادة ، و خرجت قعدت على القهوة كالعادة لازم فنجان القهوة و كانت مشغلة قناة الجزيرةالإخبارية و ده غريب لأن القهوة بتشغل الجزيرة الرياضية و الغريب إني لا قيت حاجة الناس ممكن كلها تتكلم فيهاغير الكورة ، طبعا موضوع المذابح الوحشية في العزيزة الصامدة غزة و تباينت الآراء بين سطحي غير فاهم و رأي جماهيري مندفع و رأي عاقل أو من وجهة نظر صاحبه لأنه حاسس لما بيتكلم بهدوء يبقى رأيه عاقل غفلت عن فنجان القهوة لغاية ما برد وانا متتبع لرأي الناس طبعا بدون تنصت (لأني لا أحب التجسس على الناس و هم بيتكلموا) ثانيا لأن الناس كلها بتتكلم بصوت عالي مش محتاج حد يتنصت عشان يسمعهم .
كل ده مش غريب لكن الغريب إنهم تطرقوا لأنظمة الحكم العربية و قالوا إن العالم العربي مقسوم بعضه ملكي و بعضه جمهوري ،مش ده الغريب ، الغريب رأي سمعته من أحد الأشخاص تظهر عليه علامات إنه حرفي ( من الحرفة ) نقاش أو صنايعي باللغة الدارجة قال سوريا مش ماشية بالجمهورية و لا بالملكية هية كانت أيام حافظ الأسد جمهورية لكن لما ورثها لابنه تحت تحت اسم الجمهورية كان شيء غريب ، و قال ان مصر تخطو نفس الخطوات ، و لكن المشكلة في تصنيف سوريا و مصر بعدما يحصل ده هنسميهم ايه جمهورية و لا ملكية و انطلق الأخ الصنايعي نسميهم ( مجمرة ) ، و خرجت من صمتي العميق و الاكتفاء من المشاهدة و سألته: يعني ايه ؟و ليه ؟ بص لي مستغرب لأنه كان بيتكلم طول الوقت و يبص لي و شايفني ساكت عايز اي انطباع و يقول في نفسه انت ( من ديشنا و لا من ديش العدو )_ على رأي النكتة المشهورة _ و لما سألته سكت شوية و كأنه اتشجع و قا ل في نفسه هاقولك حتى لو كنت من جيش العدو ( مجمرة ) يا بيه عشان تبقى خليط من مملكة و جمهورية قلت له :أنت مش ملاحظ إن المجمرة اسم البتاعة دي اللي بنحط فيها الجمر الفحم المولع يعني ، معلقش و اكتفى بقوله : ما تفرقش كتير يا بيه .و سكت و كأني قلت حاجة غريبة ، وسكت الجميع مش عارف ليه تقريبا الماتش بدأ،و لأني مش متابع كورة شربت القهوة اللي بردت و مشيت لأني اتأخرت عن موعد خاص . مشيت و انا مستغرب من عقل اللي بنسميهم بسطاء . و ظلت معايا علامة استفهام و علامتين تعجب كالعادة .
(يسعدني تعليقك و لو بكلمة)
